![](../immagini/rifugio-ciampedie-la_04.jpg) |
Max e duta sia Familia Pederiva ve disc “Benvegnui sun Ciampedie”!
![](../images/cimapedie-catinaccio01.jpg)
D’ istà noi sion averć segur a partir da la pruma setemana de jugn, enscin a la pruma setemana de otober. D’invern sion averć da Nadal enscin a Pasca. Fora da chisc tempes, l’è miec che ne chiamassade per sentir se sion su!
D’ istà se pel dormir te noscia ciasa da mont. Ence vos, jent da chiò… valch outa conzedeve de passar na sera sa mont, te la pasc de nesc monc, da lonc da l bordel! Anchècondì n muie de nos no se recorda più che che vel dir se fermar a scutar l chiet e a vardar la steiles... E chest l’è dal bon n gran pecià. Noscia Val de Fascia è n cianton de paradis, n muie de jent ta l mond volessa esser a l nosc post! Ma sarà coscita per semper demò se nos aeron amor par noscia Val e se no se desmentieron de noscia gran fortuna...
Chest è l prum motiv che ne à spent a traslatar nosc “web- site” par ladin... L’è dalbon de gran emportanza che ence i joegn, che co l computer i ge sa far, no i se desmentie de nosce reisc! Aldìdanchè Internet l ne dasc l met par slariar fora noscia cultura senza confins!
CO CHE SE PEL RUAR SUN CIAMPEDIE?
L saede benon , da Vich part la funivia che te pec’ menuc’ ve porta cassù... E da l’invern passà te funivia se pel ruar co la neves s-ciales a motor che part da Piaz Massar! Da Pera se ruar senza far fadia co la seggiovia, che la è averta d’istà e d’invern.
Ma saon che ve piasc ence jir a pè... Donca podede ciapar l vial Nr. 544 da Vich o l vial Nr 543 da Pera. E a chi che ge sa bel jir co la roda, l’è la strades da bosch.
Co la funivia, a pè, co la roda... Na outa ruè cassù no volarede più ve n jir de retorn!
Noscia ciasa da mont la se troa a 2000 metres sora l livel del mar, te mez a l pian de Ciampedie. Saede che, traslatà per fascian, Ciampedie vel dir “Ciamp de Die”? Muie de jent la ne domana l motiv... Duc nos fascegn, almanco na outa a l’an, cognassane oujer n gran “De tal pai” a l Segnor che ne à donà bosc, prè, ciel e monc dal color più bel e vif! Dut d’intorn a l pian de Ciampedie l’è bie e segn bosc’ de peces, zirmes e larjes. Envers sud se veit la basa Val, con i paijes de Soraga, Vich e Poza. Da chiò se pel goder n panorama che te lascia senza fià... Fora da usc l Ciadenac’ somea de l poder tociar co la mans da tant vejin che l’è, e la trei Torns da l Vajolet somea torns de n antich ciastel! L Larsech l fasc beleche imprescïon da tant gran che l’è! E da te do Roda de Vael e i Mugogn se veit valch outa chi veies striogn che se bega e che fasc sciampar la vivanes! Ma da chiò se pel veder ence l Sella, l Pordoi, la Mormolada co l Gran Vernel, i Monciogn, l Lagorai e l Latemar.
|
|