Conties

La maravea de nesc monc’ à dat vita a n muion de lejendes e conties, che da egn e egn  vegn contade de pare en fì. La Val de Fascia, co i colores de sie monc’, bosc’ e ciel, è teater natural de chesta conties. Nesc ghesc su chest è semper muie curious, e canche i ne domana de ge n contar una, noi ge conton semper chela de Re Laurin e de soa reses, scrita da Karl Felix Wolff te l liber “i monti pallidi”... Sion proprio te l mez de so ream!! Valch outa però l’è sozedù che bec’ fascegn i è sutè jù da na nigola, percheche Re Laurin no i l’aea mai sentù nominar, e chest ne à fat gran despiajer. Donca, tolon l’ocajion par comedar ite...
Laurin era n re muie potent ma valent, che goernaa su n ream muie gran e muie bel. L ream era sconet te l grop de l Ciadenac, olache Laurin stajea con sie popul de zeberchies lurenc. L ream era scuert da n vidor de reses checene.
Na bela dì, Laurin è vegnù a saer che n re, sie vejin, aea na belota fia de inom Similda, e donca l’à dezedù de la domanar sposa. Dotrei zeberchies è jic’ da ela par cont de Laurin , ma ela à responet che no la volea se maridar. Laurin, che l’era n strion dassen fort, co n encanteijim à emprejonà Similda e i la à portada te l cher de l Ciadenac.

Set egn più tart, l fra de Similda è vegnù zacan a saer olache la era stata sconeta, e l’è pontà de mez con aldò n grop de verieres par la librar. Ruè te l ream de Laurin, un de i cavalieres l’à sbregà co na gran ira n pugn de reses, e Laurin è sutà su enirà deschè n poie. I zeberchies e i verieres à tacà a se begar, e fossa stat na gran vera se, fora da n bel nia, Similda no la fossa sutàda fora  da n usc vèrt te l crep. Ela à dit a sie frà che la era contenta de l veder, e che Laurin i la aea semper tratada deschè na reina. La paroles de Similda à portà pasc te anter i combatenc’.

Via par la not, dotrei verieres à tacà bega co i morchies, e la batalia la è endò scomenzada. Chesta outa Laurin e i morchies è stac batui, e l re portà de mez prejonier.